Улстөр нийгэм
Төв аймгийн зарим сумдын Эрүүл мэндийн төвийн үйл ажиллагаатай танилцлаа
Сэргэлэн суманд УИХ-ын дэд дарга С.Одонтуяа, УИХ-ын гишүүн М.Оюунчимэг, Алтанбулаг суманд УИХ-ын гишүүн Д.Сарангэрэл нар тус тус ажилласан юм. Төв аймгийн Сэргэлэн сумын Эрүүл мэндийн төвийн дарга, их эмч Х.Ариун-Эрдэнэ анхан шатны эрүүл мэндийн тусламж, үйлчилгээг хэрхэн үзүүлдэг талаар танилцуулав. Сэргэлэн сумын 758 өрхийн 2003 иргэнд анхан шатны эрүүл мэндийн тусламж үйлчилгээг үзүүлдэг байна.
Сэргэлэн сум төмөр замын долоон өртөөтэй, хоёр талаараа засмал замтай учраас зорчих хөдөлгөөн ихтэй. Тиймээс сумын иргэдээсээ гадна анхан шатны тусламж шаардлагатай зорчигчдод эрүүл мэндийн үйлчилгээг үзүүлдэг ажээ. Сумын Эрүүл мэндийн төв болон багийн төвүүдэд нийт гурван их эмч, 11 сувилагч, есөн үйлчилгээний ажилтан ажиллаж байна. Тус төв сүүлийн есөн жилд эх, хүүхдийн эндэгдэл гаргаагүй ажиллажээ.
Төв аймгийн Алтанбулаг сумын Эрүүл мэндийн төв нь нийт 4 багийн 3300 гаруй хүн амд хоёр их эмч, гурван бага эмч, таван сувилагч, эмийн санч, лабороант болон бусад туслах ажилтнуудын бүрэлдэхүүнтэйгээр эрүүл мэндийн тусламж үйлчилгээ үзүүлж байна.
Тус төв гадны донор байгууллагуудын тусламжтайгаар “Эрүүл мэндийн анхан шатны тусламж үйлчилгээ болон олон нийтийн түвшинд мобайл технологийг нэвтрүүлэх нь” төслийг хэрэгжүүлж эхэлжээ. Мобайл технологийн тусламжтайгаар олон эерэг ер дүн гарч байгаа талаар танилцуулж байсан юм.
Энэ үеэр УИХ-ын дэд дарга С.Одонтуяа, манай орон өргөн уудам газар нутагтай. Хүн ам сийрэг суурьшилтай учраас иргэн бүрт эрүүл мэндийн анхан шатны тусламж үйлчилгээг хүргэх нь бэрхшээлтэй. Гэвч бидэнд хүрсэн үр дүн бий. Ялангуяа Сэргэлэн сумын эрүүл мэндийн төв бол манай зочдын анхаарлыг татлаа. Эрүүл мэндийн төвөө өргөтгөж, анхан шатны тусламжийг цаг алдалгүй хүргэж байгаад талархаж байна. Бид харилцан бие биеэсээ туршлага судалж, суралцах зүйл олон байна. Тухайлбал, орон нутагтаа сувилагчаар ажиллаж буй хүнээ дахин суралцуулж, эмчийн мэргэжил эзэмшүүлэх нь алслагдсан газарт боловсон хүчний хомсдолд орохгүй байх бас нэг шийдэл гэж гадныхан туршлагаасаа хуваалцлаа гэв.
Мөн УИХ-ын гишүүн М.Оюунчимэг, 2023 оны төсөвт эрүүл мэндийн анхан шатны тусламж үйлчилгээ үзүүлэх зардлыг нэг иргэнд 20 мянган төгрөгөөр тооцдог байсныг 60 мянган төгрөг болгон нэмэгдүүлж, нийт 93 тэрбум төгрөг төсөвлөсөн. Эрүүл мэндийн салбарт шинэчлэл хийж, гүйцэтгэлд суурилсан санхүүжилтийг хэрэгжүүлж байгаа ч бодит үр дүнг шаардаж байна. Тиймээс менежмэнтийг сайжруулж, эмч, сувилагч нарыг тогтвортой ажиллуулах, инновацийн шинэчлэл хийх шаардлагатай байна. УИХ-ын намрын чуулганаар Нийгмийн эрүүл мэндийн тухай хууль болон анхан шатны эрүүл мэндийн чиглэлийн хуулиудыг хэлэлцэн баталж, хууль эрх зүйн орчинг сайжруулах талаар ажиллана гэж ярив.
ДЭМБ-ын Номхон далайн баруун бүс дэх төлөөлөгчийн газрын Эрүүл мэндийн тогтолцоо, тусламж үйлчилгээний газрын захирлын үүрэг гүйцэтгэгч Ллуис Виналс Торрес хэлэхдээ, Монголын Улсын эрүүл мэндийн салбарыг төлөөлөн Сэргэлэн сумын эрүүл мэндийн төвийн үйл ажиллагаатай танилцлаа. Тус төв халдварт бус өвчнөөс урьдчилан сэргийлэх, эрт илрүүлэхэд чухал ач холбогдол өгч байгаа нь сайшаалтай. Мөн гүйцэтгэлд суурилсан төлбөр тооцоо буюу нэг хүнд ногдох санхүүжилт гэх мэт сонирхолтой шинэчлэлүүдийг хэрэгжүүлж буй нь зарим орнуудад туршлага болно гэв хэмээн Улсын Их Хурлын Хэвлэл мэдээлэл, олон нийттэй харилцах газраас мэдээллээ.
Улстөр нийгэм
Нэгдүгээр ангийн элсэлтийг E-Mongolia-аар зохион байгуулна
2026 оны 8 дугаар сарын 17-28-ны өдрүүдэд Улаанбаатар хотод НҮБ-ын Цөлжилттэй тэмцэх тухай конвенцын Талуудын 17 дугаар бага хурал (COP17) болно.
Энэ хурал нь дэлхийн 197 улсын Засгийн газрын гишүүд, эрдэмтэн судлаач, хувийн хэвшил, иргэний нийгмийн байгууллага нэгдэж цөлжилт, газрын доройтол, ган гачигтай тэмцэх хамгийн том Олон Улсын арга хэмжээ юм.
Хурал болохтой холбоотой нийслэлийн замын хөдөлгөөн, аюулгүй байдал, төрийн үйлчилгээний хэвийн ажиллагааг хангах зорилгоор боловсролын байгууллагуудын үйл ажиллагаанд дараах зохицуулалт хэрэгжүүлэхээр болжээ .
Цэцэрлэгийн бүртгэл
- 2026 оны 8 дугаар сарын 10–23-ны өдрүүдэд E-Mongolia системээр бүртгэнэ.
Нэгдүгээр ангийн элсэлт
- 2026 оны 8 дугаар сарын 17–28-ны өдрүүдэд E-Mongolia системээр бүртгэнэ.
- Энэ хугацаанд хүүхэд бүртгэх дэмжлэгийн баг сургуулиуд дээр ажиллахгүй.
Их, дээд сургуулийн хичээл
- 2026 оны 9 дүгээр сарын 1-нээс цахимаар эхэлнэ.
- 2026 оны 9 дүгээр сарын 14-нөөс танхимаар үргэлжилнэ.
Оюутны дотуур байр
- 2026 оны 9 дүгээр сарын 13-наас оюутнуудыг дотуур байранд оруулж эхэлнэ.
Сургууль, цэцэрлэгийн үйл ажиллагааны зохицуулалт
- 2026 оны 8 дугаар сарын 17–28-ны өдрүүдэд нийслэлийн бүх сургууль, цэцэрлэгт ажлын байранд элсэлт, бүртгэл болон бусад аливаа арга хэмжээ зохион байгуулахгүй болно.
Улстөр нийгэм
Францад иргэд рүү зөвшөөрөлгүй сурталчилгааны дуудлага хийхийг хориглов
Франц улс иргэдийн урьдчилсан зөвшөөрөлгүйгээр бараа, үйлчилгээ сурталчлах зорилгоор утсаар холбогдохыг хориглосон шинэ хуулийг наймдугаар сарын 11-нээс хэрэгжүүлнэ. Уг зохицуулалт нь иргэдийг залхаасан борлуулалтын дуудлага болон залилангийн шинжтэй арилжааны үйл ажиллагаанаас хамгаалахад чиглэжээ.
Өмнө нь сурталчилгааны дуудлага хүлээн авахгүй байхыг хүссэн иргэд төрийн тусгай бүртгэлд утасны дугаараа оруулах шаардлагатай байсан ч зарим дуудлагын төв уг жагсаалтыг үл тоодог байжээ. Шинэ хуулиар харин аж ахуйн нэгжүүд хэрэглэгчээс урьдчилан зөвшөөрөл аваагүй тохиолдолд сурталчилгааны зорилгоор утсаар холбогдох эрхгүй болно. Иргэн өгсөн зөвшөөрлөө хүссэн үедээ цуцлах боломжтой.
Францын эрх баригчдын тооцоолсноор тус улсын иргэдийн дөрөвний гурав орчим нь долоо хоног бүр дор хаяж нэг удаа хүсээгүй сурталчилгааны дуудлага хүлээн авдаг бөгөөд олон хүн үүнээс ч олон дуудлагад өртдөг байна. Хэрэглэгчийн эрхийг хамгаалах 11 байгууллага 2024 онд хамтран шаардлага гаргаж, суурин болон гар утас руу ирдэг тасралтгүй сурталчилгааны дуудлагыг хориглохыг уриалж байжээ.
Хуулийг зөрчиж дуудлага хийсэн хувь хүнийг нэг дуудлага тутамд 75 мянга хүртэлх евро, аж ахуйн нэгжийг 375 мянга хүртэлх еврогоор торгох боломжтой. Харин хэрэглэгч өөрөө зөвшөөрсөн, эсвэл тухайн компанитай өмнө нь гэрээний харилцаатай бөгөөд шинэ үйлчилгээ санал болгож буй тохиолдолд хориг үйлчлэхгүй. Иргэд зөвшөөрөлгүй дуудлагын талаар төрийн цахим хуудсаар мэдээлэх боломжтой.
Шинэ хууль Францын зах зээлд үйлчилдэг гадаадын дуудлагын төвүүдэд нөлөөлөхөөр байна. Тухайлбал, Мароккогийн дуудлагын төвүүдийн орлогын 80 гаруй хувь Францын зах зээлээс бүрддэг бөгөөд тус улсын 40–50 мянган ажлын байр эрсдэлд орж болзошгүйг Мароккогийн хөдөлмөр эрхлэлтийн сайд мэдэгджээ.
Улстөр нийгэм
Засгийн газар энэ оныг дуустал санхүүгийн хэмнэлтийн горимд шилжинэ
Засгийн газрын 2026 оны наймдугаар сарын 5-ны өдрийн хуралдаанаар “Төсвийн санхүүжилтэд эрэмбэ тогтоож, төсвийн хэмнэлт, мөнгөн хөрөнгийн зохицуулалт хийх зарим арга хэмжээний тухай” тогтоолыг баталлаа.
Тогтоолоор төрийн албан хаагчдын цалин, тэтгэвэрт гарах нэг удаагийн тэтгэмж, орон нутгийн нэмэгдэл тэтгэмж, тэтгэвэр, хүүхдийн мөнгө, бүх төрлийн халамж, сургууль, цэцэрлэг болон сургалтын байгууллагын урсгал засвар, санхүүжилт, төрийн байгууллагын интернетийн төлбөр, байр ашиглалтын зардал, хууль, хүчний байгууллагын тээвэр, шатахууны зардал, дотоодын томилолт, хоол хүнс, нормын хувцасны зардал, COP17 олон улсын бага хурлын зардал, Засгийн газрын өр, орон нутгийн нөөц хөрөнгийн санхүүжилтийг хэвийн үргэлжлүүлэхээр шийдвэрлэжээ.
Харин дараах зардлыг хязгаарлахаар болсон байна. Үүнд:
- Олон улсын болон Засгийн газрын шийдвэртэйгээс бусад хурал, зөвлөгөөн, ой, тэмдэглэлт өдөр, найр наадам, соёлын арга хэмжээ;
- Урьдчилан төлөвлөсөн төрийн өндөр албан тушаалтны томилолтоос бусад гадаад томилолт, гадаадын зочин хүлээн авах зардал;
- Зайлшгүй шаардлагагүй тоног төхөөрөмж, тавилга, автомашин худалдан авах;
- Батлан хамгаалах, хууль зүйн салбараас бусад сургалт, дадлага;
- Хуулиар заавал мэдээлэхээс бусад кино, контент, хэвлэлийн зардал;
- Заавал олгохоос бусад тэтгэмж, урамшуулал.
Санхүүгийн хэмнэлтийн горимыг 2026 оны арванхоёрдугаар сарын 31 хүртэл мөрдөнө. Харин эрүүл мэндийн салбар уг хэмнэлтийн горимд хамрагдахгүй бөгөөд цэцэрлэг, сургуулийн хүүхдийн эрт илрүүлэг, вакцинжуулалт, томуу, томуу төст өвчний эсрэг арга хэмжээ зэрэг зайлшгүй шаардлагатай ажлууд төлөвлөгөөний дагуу үргэлжилнэ гэж Ерөнхий сайд Н.Учрал онцоллоо.
Мөн бүх шатны төсвийн ерөнхийлөн захирагч нарт салбар бүрдээ урсгал зардлыг 20 хувиар бууруулах, нөхөн томилгоо хийхгүй байх, аялал, амралт, зугаалга, хамт олны урлаг, спортын арга хэмжээг зохион байгуулахгүй байх, төрийн албанд шинэ орон тоо бий болгохгүй байх, эрчим хүчний хэрэглээг хэмнэх, хурал, сургалтыг цахим хэлбэрт шилжүүлэх, төрийн албан хаагчдыг зарим өдрүүдэд цахимаар ажиллуулах арга хэмжээг үргэлжлүүлэхийг үүрэг болголоо.
Төсвийн сахилга бат сайжирч, эдийн засгийн нөхцөл байдал хэвийн болсон тохиолдолд эдгээр хязгаарлалтыг үе шаттайгаар сулруулах юм.
-
Үзэл бодол2021/01/21
А.Отгонбаатар: Жагсаалыг Х.Баттулга засгаа самрах тоглоом болгож завааруулсан
-
Цаг үе2022/06/10
Төрийн албан хаагчид албан харилцаанд хувийн цахим шуудан ашиглахыг хориглов
-
Цаг үе2021/04/06
Монголын анхны папараци сэтгүүл “Соронз” аппликейшнаар хүрдэг боллоо...
-
Цаг үе2021/05/07
Санхүүгийн салбарын 2021 оны нэгдүгээр улирлын тойм мэдээллээ танилцууллаа